കുട്ടിക്കാനം മുറിഞ്ഞപുഴ കടുവാപ്പാറക്ക് സമീപം നിയന്ത്രണം വിട്ട മിനിലോറി കൊക്കയിലേക്ക് മറിഞ്ഞ് ഒരാൾ മരിച്ചു. വാഹനത്തിന്റെ ഡ്രൈവർ കോട്ടയം പള്ളം സ്വദേശി ജോമോൻ ജോസഫ് (26 ) ആണ് മരിച്ചത്. റോഡിൽ നിയന്ത്രണം നഷ്ടമായ വാഹനം 1000 അടി താഴ്ചയിലേക്കാണ് പതിച്ചത്. കൊട്ടാരക്കര - ഡിണ്ടിഗൽ ദേശീയപാതയിൽ കുട്ടിക്കാനം - മുറിഞ്ഞപുഴയ്ക്കും കടുവാപ്പാറയ്ക്കുമിടയിലാണ് സംഭവം.
വ്യാഴാഴ്ച ഉച്ചകഴിഞ്ഞ് മൂന്നരയോടെയാണ് അപകടം നടന്നത്. കോട്ടയം പള്ളത്തുനിന്ന് ടയറുകളുമായി കട്ടപ്പനയ്ക്ക് പോകുംവഴിയാണ് അപകടം. പാതയിൽനിന്ന് നിയന്ത്രണം വിട്ട മിനിവാൻ ഏകദേശം 1000 അടി താഴ്ച്ചയിലേയ്ക്ക് പതിക്കുകയായിരുന്നു.
മിനി വാൻ മറിയുന്നതിനിടെ വാഹനത്തിൽനിന്ന് തെറിച്ചുപോയ ഡ്രൈവർ 250 അടി താഴ്ചയിൽ വീണുകിടക്കുകയായിരുന്നു. അപകടത്തിൽപ്പെട്ട വാഹനത്തിന് പിന്നാലെ വന്ന വാഹനയാത്രക്കാരും സമീപവാസികളും ചേർന്ന് ആദ്യം രക്ഷാപ്രവർത്തനം ആരംഭിച്ചു.
ഉടൻ തന്നെ മുണ്ടക്കയത്തെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. പീരുമേട് ഫയർ ആൻഡ് റെസ്ക്യൂ സ്റ്റേഷൻ ഓഫീസർ സുഗുണൻ, സീനിയർ ഫയർ ആൻഡ് റെസ്ക്യൂ ഓഫീസർമാരായ മധു, നിസാമുദ്ദീൻ, ഫയർ ഓഫീസർമാരായ ജിസ്സ്, വിവേക്, റഫീക്ക്, രാഹുൽ, നികേഷ്, അൻഷാദ്, മനു ഇ ജി എന്നിവർ രക്ഷാപ്രവർത്തനത്തിന് നേതൃത്വം നൽകി.