തിരുവനന്തപുരം: കോവിഡ് മൂന്നാം തരംഗത്തില്‍ അടച്ച സംസ്ഥാനത്തെ സ്കൂളുകളിലെ ഒന്ന് മുതല്‍ ഒമ്ബത് വരെ ക്ലാസുകളില്‍ തിങ്കളാഴ്ച അധ്യയനം പുനരാരംഭിക്കുന്നു.
സ്കൂളുകളോട് ചേര്‍ന്ന് പ്രവര്‍ത്തിക്കുന്ന പ്രീ പ്രൈമറി ക്ലാസുകളും തിങ്കളാഴ്ച ആരംഭിക്കും. ഇവര്‍ക്ക് തിങ്കള്‍ മുതല്‍ വെള്ളി വരെ 50 ശതമാനം പേരെ പങ്കെടുപ്പിച്ച്‌ ഉച്ചവരെ ക്ലാസ് നടത്താം. പൊതു അവധി ഒഴികെയുള്ള മുഴുവന്‍ ശനിയാഴ്ചകളിലും പ്രവര്‍ത്തിക്കും.
ഈ മാസം 21 മുതല്‍ ഒന്ന് മുതല്‍ പ്ലസ് ടു വരെയുള്ള ക്ലാസുകള്‍ ബാച്ച്‌ സമ്ബ്രദായം ഒഴിവാക്കി, മുഴുവന്‍ കുട്ടികളെയും ഒന്നിച്ചിരുത്തി വൈകീട്ട് വരെയുള്ള ക്ലാസുകള്‍ ആരംഭിക്കുമെന്ന് മന്ത്രി വി. ശിവന്‍കുട്ടി വാര്‍ത്തസമ്മേളനത്തില്‍ അറിയിച്ചു. തീരുമാനം സംസ്ഥാനത്ത് പ്രവര്‍ത്തിക്കുന്ന മുഴുവന്‍ സ്കൂളുകള്‍ക്കും ബാധകമാണ്. നിലവില്‍ 10, പ്ലസ് വണ്‍, പ്ലസ് ടു ക്ലാസുകള്‍ക്ക് രാവിലെ മുതല്‍ വൈകീട്ട് വരെ ബാച്ചുകളായുള്ള അധ്യയനം തുടരുന്നുണ്ട്.
വിദ്യാര്‍ഥികള്‍ യൂനിഫോം ധരിച്ച്‌ സ്കൂളിലെത്തുന്നതാണ് ഉചിതം. ഇപ്പോഴത്തെ സാഹചര്യത്തില്‍ പകുതി കുട്ടികള്‍ എത്തുന്നതും മുഴുവന്‍ കുട്ടികള്‍ എത്തുന്നതും ഒരുപോലെയാണെന്നും മന്ത്രി പറഞ്ഞു. സ്കൂളുകള്‍ പൂര്‍ണതോതില്‍ പ്രവര്‍ത്തിക്കുന്നതിന്‍റെ മുന്നോടിയായി പൊതുവിദ്യാഭ്യാസ വകുപ്പ് നിലവിലുള്ളതിനു പുറമെ അധിക നിര്‍ദേശങ്ങള്‍ ഉള്‍പ്പെടുത്തിയുള്ള മാര്‍ഗരേഖയും പ്രസിദ്ധീകരിച്ചു.
സാധാരണ ടൈംടേബിള്‍ പിന്തുടരണം
ഒന്ന് മുതല്‍ ഒമ്ബത് വരെ ബാച്ചടിസ്ഥാനത്തില്‍ ഉച്ചവരെ ക്ലാസ് (14ാം തീയതി വരെ)
10, പ്ലസ് വണ്‍, പ്ലസ് ടു വൈകീട്ട് വരെ ബാച്ചുകളായി തുടരും (19ാം തീയതി വരെ)
10, പ്ലസ് ടു പാഠഭാഗങ്ങള്‍ ഫെബ്രുവരി 28നകം പൂര്‍ത്തിയാക്കി റിവിഷന്‍ തുടങ്ങണം.
ശനിയാഴ്ചകളില്‍ സ്കൂള്‍തല എസ്.ആര്‍.ജി ചേര്‍ന്ന് വിലയിരുത്തല്‍ നടത്തണം.
എസ്.എസ്.എല്‍.സി, പ്ലസ് ടു പാഠഭാഗങ്ങള്‍ സംബന്ധിച്ച്‌ അധ്യാപകര്‍ പ്ലാന്‍ തയാറാക്കണം; എത്ര പഠിപ്പിച്ചെന്ന് റിപ്പോര്‍ട്ട് നല്‍കണം.
എസ്.എസ്.എല്‍.സി, പ്ലസ് ടു, വി.എച്ച്‌.എസ്.ഇ പഠന പിന്തുണ പ്രവര്‍ത്തനങ്ങള്‍ ആവിഷ്ക്കരിക്കണം.
പഠനത്തില്‍ പിന്നില്‍ നില്‍ക്കുന്നവര്‍ക്കായി പ്രത്യേക കര്‍മ പദ്ധതി വേണം.
കുട്ടികള്‍ക്ക് ആത്മവിശ്വാസം വളര്‍ത്താനും മാനസിക സംഘര്‍ഷം ലഘൂകരിക്കാനും പ്രവര്‍ത്തനങ്ങള്‍ വേണം.
ഭിന്നശേഷി വിഭാഗം ഉള്‍പ്പെടെയുള്ള കുട്ടികളുടെ പഠന വിടവ് നികത്താന്‍ വ്യക്തിഗത പിന്തുണ നല്‍കണം.
ഡിജിറ്റല്‍/ഓണ്‍ലൈന്‍ ക്ലാസുകളും പിന്തുണ പ്രവര്‍ത്തനങ്ങളും ആവശ്യാനുസരണം തുടരാം.
തിങ്കള്‍ മുതല്‍ വെള്ളിവരെ പ്രീ പ്രൈമറി ക്ലാസുകള്‍ 50 ശതമാനം കുട്ടികളെ ഉള്‍പ്പെടുത്തി നടത്താം.
ഒന്ന് മുതല്‍ ഒമ്ബത് വരെയുള്ള ക്ലാസുകള്‍ക്ക് വാര്‍ഷിക പരീക്ഷ നടത്തും; തീയതി പിന്നീട്.
എസ്.എസ്.എല്‍.സി, ഹയര്‍ സെക്കന്‍ഡറി, വി.എച്ച്‌.എസ്.ഇ മോഡല്‍ പരീക്ഷകള്‍ മാര്‍ച്ച്‌ 16ന് ആരംഭിക്കും
