ആലപ്പുഴ: രണ്ടു കുഞ്ഞുങ്ങളെ കഴുത്ത് ഞെരിച്ചും ബക്കറ്റിലെ വെള്ളത്തില്‍ മുക്കിയും കൊലപ്പെടുത്തിയ ശേഷം യുവതി ജീവനൊടുക്കിയ സംഭവത്തില്‍ ഭര്‍ത്താവായ സിവില്‍ പൊലീസ് ഓഫീസര്‍ ആലപ്പുഴ സക്കറിയ വാര്‍ഡ് നവാസ് മന്‍സിലില്‍ റെനീസിനെ (32) അറസ്റ്റ് ചെയ്‌തു.
ആലപ്പുഴ എ.ആര്‍. ക്യാമ്ബ് ക്വാര്‍ട്ടേഴ്സില്‍ നജില (27), മക്കളായ ടിപ്പു സുല്‍ത്താന്‍ (5), മലാല (ഒന്നര) എന്നിവരെ മരിച്ച നിലയില്‍ കണ്ടെത്തിയപ്പോള്‍ തന്നെ റെനീസിനെ സൗത്ത് പൊലീസ് കസ്റ്റഡിയിലെടുത്തിരുന്നു. സ്ത്രീപീഡനം, ആത്മഹത്യാ പ്രേരണ എന്നീ കുറ്റങ്ങളാണ് ചുമത്തിയിരിക്കുന്നത്. റെനീസിനെതിരെ നജിലയുടെ ബന്ധുക്കള്‍ പൊലീസില്‍ പരാതി നല്‍കിയിരുന്നു.
'നിഗൂഢതകളുടെ നന്ദന്‍കോട് കൂട്ടക്കൊല'; ചിരിച്ച മുഖവുമായി മാധ്യമങ്ങളെ കണ്ട കേദല്‍ ജിന്‍സന്‍ ഇപ്പോള്‍ എവിടെയാണ്
റെനീസില്‍ നിന്ന് നിരന്തരം മാനസിക,ശാരീരിക പീഡനം യുവതി അനുഭവിച്ചെന്ന് ബന്ധുക്കള്‍ മൊഴി നല്‍കി. നജില എഴുതാറുണ്ടായിരുന്ന ഡയറി കാണാനില്ല. റെനീസിന് ബന്ധുവായ യുവതിയുമായുള്ള ബന്ധം ചോദ്യം ചെയ്തതാണ് പ്രശ്നങ്ങള്‍ക്ക് കാരണമെന്നാണ് വിവരം. യുവതിയും മക്കളും മരിക്കുന്നതിന് തലേദിവസം ക്വാര്‍ട്ടേഴ്സില്‍ ഒരു സ്ത്രീ വന്നിരുന്നു.
ഇതേച്ചൊല്ലി നജിലയും റെനീസും തമ്മില്‍ വഴക്ക് നടന്നതായും നജിലയുടെ സഹോദരി നഫില പറഞ്ഞു. പല തവണ നജില വിവാഹമോചനം ആവശ്യപ്പെട്ടു. പിരിഞ്ഞുപോയാല്‍ നജിലയുടെ സഹോദരിയുടേതടക്കമുള്ള കുടുംബം തകര്‍ക്കുമെന്ന് റെനീസ് ഭീഷണിപ്പെടുത്തിയിരുന്നതായും ബന്ധുക്കള്‍ പറഞ്ഞു. ആരോപണ വിധേയയായ യുവതിയെ ഇന്നലെ ചോദ്യം ചെയ്‌തു. റെനീസിനെ ഇന്ന് കോടതിയില്‍ ഹാജരാക്കും. നജിലയുടെയും കുട്ടികളുടെയും സംസ്ക്കാരം ആലപ്പുഴ പടിഞ്ഞാറെ ഷാഫി ജുമാ മസ്ജിദ് കബര്‍സ്ഥാനില്‍ നടന്നു. പോസ്റ്റ്മോര്‍ട്ടം റിപ്പോര്‍ട്ട് ലഭിച്ചാലെ മരണത്തെക്കുറിച്ച്‌ വ്യക്തതവരുകയുള്ളുവെന്ന്പൊലീസ് വ്യക്തമാക്കി.
