കോട്ടയം: പേവിഷബാധയേറ്റ് കോട്ടയം മെഡിക്കൽ കോളേജിൽ പ്രവേശിപ്പിച്ച ഇതര സംസ്ഥാന തൊഴിലാളി ആശുപത്രിയിൽ നിന്നും മുങ്ങി. അസം സ്വദേശി ജീവൻ ബറുവ (39) ആണ് ആശുപത്രിയിൽ നിന്നും കടന്നുകളഞ്ഞത്. കോട്ടയം ജില്ലയിൽ പോലീസ് ജാഗ്രതാ നിർദേശം നൽകി. യുവാവിനായി തെരച്ചിൽ ആരംഭിച്ചു.
ഇന്നലെ രാത്രി 12.30 നാണ് സംഭവം. നായയുടെ കടിയേറ്റ ജീവൻ ബറുവ ആദ്യം കോട്ടയം ജനറൽ ആശുപത്രിയിലാണ് ചികിത്സ തേടിയിരുന്നത്. പിന്നീട് വിദഗ്ധ പരിശോധനകൾക്കായി യുവാവിനെ കോട്ടയം മെഡിക്കൽ കോളേജിലേക്ക് അയച്ചു. സുഹൃത്തുക്കൾക്കൊപ്പം ഓട്ടോറിക്ഷയിൽ രാത്രി 10.30 നാണ് മെഡിക്കൽ കോളേജിലെ അത്യാഹിത വിഭാഗത്തിൽ എത്തിയത്. ഇവിടെ നടത്തിയ പരിശോധനയിലാണ് യുവാവിനു പേവിഷബാധ കണ്ടെത്തിയത്.
തുടർ ചികിത്സയ്ക്കായി സാംക്രമിക വിഭാഗത്തിലേക്ക് യുവാവിനെ മാറ്റിയതിനിടെയാണ് ഇയാൾ ഇവിടെ നിന്നും രക്ഷപ്പെട്ടത്. ഉടൻ തന്നെ ആശുപത്രി അധികൃതർ വിവരം പോലീസിനെ അറിയിച്ചു. തുടർന്ന് പോലീസ് ജില്ലയിൽ ജാഗ്രതാ നിർദേശം നൽകുകയും തെരച്ചിൽ ആരംഭിക്കുകയും ചെയ്തു. 39 കാരനൊപ്പം എത്തിയ രണ്ടു സുഹൃത്തുക്കളെയും കാണാനില്ല.
